Прызнанне замежнага дыплома настаўніка ў Нідэрландах
20.04.2023Каб працаваць у Нідэрландах настаўнікам/выкладчыкам, трэба адпавядаць пэўным умовам і прайсці працэдуру прызнання замежнага дыплома ў Дэпартаменце адукацыі (Dienst Uitvoering Onderwijs – DUO), які ўваходзіць у структуру Міністэрства адукацыі, культуры і навукі. Заяўкі на прызнанне дыплома маюць права падаваць настаўнікі пачатковай і сярэдняй школы, у тым ліку настаўнікі-прадметнікі, выкладчыкі школ для дзяцей з асаблівымі патрэбамі і выкладчыкі сектара сярэдняй прафесійнай адукацыі.
Умовы для падачы заяўкі на прызнанне дыплома
Вы можаце падаць заяўку ў DUO (у папяровай ці электроннай форме) на прызнанне вашай замежнай прафесійнай кваліфікацыі, калі:
- вы прайшлі праграму падрыхтоўкі настаўнікаў/выкладчыкаў у ВНУ,
- ваш дыплом дае права выкладаць у краіне, дзе ён быў выдадзены,
- вы маеце неабходны ўзровень адукацыі і неабходную педагагічную кваліфікацыю,
- вы ў дастатковай ступені (на ўзроўні B2, пацверджаным сертыфікатам) валодаеце мовай, на якой будзеце выкладаць (нідэрландскую, англійскую або пап'ямента*).
*Заўвага: Каралеўства Нідэрландаў уключае заморскія тэрыторыі ў Карыбскім рэгіёне. Пап'ямента — гэта афіцыйная мова Нідэрландскіх Антыльскіх астравоў (разам з нідэрландскай і англійскай).
Працэдура прызнання дыплома:
- Вы адпраўляеце электронную форму (або запоўненую папяровую па ўказаным на сайце DUO адрасе) з просьбай прызнаць вашу прафесійную кваліфікацыю. Дакументальныя доказы, якія неабходна ўключыць, пазначаны ў форме.
- DUO правярае, ці падалі вы ўсе неабходныя доказы. Калі чагосьці не хапае, вы атрымаеце ліст з просьбай даслаць дакументы, якія адсутнічаюць.
- У дачыненні да вашага дыплома DUO можа пракансультавацца з Nuffic (арганізацыяй, якая займаецца міжнароднай адукацыяй) або накіраваць запыт у адпаведныя органы ў краіне, дзе быў выдадзены дыплом.
- Калі адпаведныя органы ў краіне, дзе быў выдадзены дыплом, не могуць пацвердзіць ваш дыплом, то трэба атрымаць даведку з вашай навучальнай установы, якая пацвярджае, што вы паспяхова скончылі навучанне.
- Калі вы адпавядаеце ўмовам, ваша заяўка на прызнанне дыплома будзе ўхвалена - вы атрымаеце адпаведны ліст і з ім можаце ўладкоўвацца на працу настаўнікам/выкладчыкам.
- Калі вы не адпавядаеце ўмовам, ваша заяўка будзе адхіленая.
- Калі вы лічыце такое рашэнне няправільным, то можаце падаць пярэчанне.
Калі ў вас узніклі пытанні, то вы можаце звязацца з аддзелам прызнання замежных дыпломаў DUO у працоўныя дні з 09:00 да 12:00:
- па тэлефоне: +31 50 599 77 78;
- па электроннай пошце: diplomaservices@duo.nl.
Пералік дакументаў для прызнання дыплома:
- храналагічны агляд вашай адукацыі і досведу працы,
- копія(і) дыплома(аў) аб вышэйшай адукацыі,
- копія(і) прыкладання(аў) да дыплома(ам) аб вышэйшай адукацыі з ацэнкамі,
- копія(і) аднаго або некалькіх сертыфікатаў або дыпломаў, якія пацвярджаюць, што вы адпавядаеце моўным патрабаванням (нідэрландская, англійская і/або пап'ямента),
- копія пашпарта або іншага дакумента, які пацвярджае асобу.
Калі гэтыя дакументы не на нідэрландскай, англійскай ці нямецкай мове, вы павінны прыкласці завераны пераклад (зроблены прысяжным перакладчыкам). Пераклад павінен быць прыкладзены да копіі зыходнага дакумента на зыходнай мове. DUO не апрацоўвае заяўкі без пераводаў.