«Каранавірусныя» даўгі цягнуць на дно 135 тысяч кампаній

Як паведамляе газета Financieele Dagblad (FD), каля 135 кампаній могуць сутыкнуцца з праблемамі, калі з кастрычніка павінны будуць выплачваць мільярдныя «каранавірусныя» даўгі па падатках. У час каранакрызісу многім прадпрымальнікам прадаставілі адтэрміноўку па выплаце падаткаў, што дазволіла прадухіліць банкруцтвы. Тады ўладальнікі бізнэсу спадзяваліся на хуткае аднаўленне сваёй плацежаздольнасці, аднак гэтага не здарылася.

Неспрыяльныя фактары

Паводле апытання, праведзенага сярод прадстаўнікоў малога і сярэдняга бізнесу (kleine en middelgrote bedrijven - MKB), большасць прадпрымальнікаў непакоіць спалучэнне такіх неспрыяльных фактараў, як неабходнасць пагашаць запазычанасць па падатках (з аднаго боку) і рост затрат на энерганосьбіты, арэнду, сыравіну і заработную плату (з іншай).

лічбы

З першапачатковага доўгу па падатках - 47 млрд еўра - амаль 20 млрд еўра ўсё яшчэ не пагашаны. Даўжнікамі застаюцца каля 280 000 прадпрымальнікаў. Праблемы чакаюцца амаль у паловы, што можа прывесці да непагашанага доўгу 9 мільярдаў еўра.

Паслабленні

У ліпені ўрад аб'явіў аб даступных паслабленнях, якімі могуць скарыстацца прадпрымальнікі: 1) перыядычныя перапынкі ў аплаце; 2) штоквартальныя выплаты замест штомесячных. У асобных выпадках таксама магчымы спецыяльныя дамоўленасці.

Страты

У паведамленні асацыяцыі MKB-Nederland гаворыцца: «Не ўсе кампаніі змаглі справіцца з шкодай ад каранакрызісу, і многія прадпрымальнікі не могуць – ці наўрад могуць – справіцца з узрослымі выдаткамі зараз».

Па словах Ганса Бішавеля (Hans Biesheuvel) з арганізацыі прадпрымальнікаў ONL, у сферы грамадскага харчавання сітуацыя «безнадзейная». Негатыўна адбіваецца на плацежаздольнасці прадпрыемстваў недахоп персанала. Напрыклад, па гэтай прычыне з абмежаваннямі працуюць многія кейтэрынгавыя кампаніі і, такім чынам, ствараюць менш рэзерваў. Па словах Бішавеля, з-за росту коштаў, высокіх рахункаў за электраэнергію і іншых неспрыяльных фактараў нават павелічэнне тэрміну пагашэння доўгу не дапаможа. Згодна з галіновай справаздачай, якую апублікаваў банк ABN Amro, 17% прадпрыемстваў грамадскага харчавання панеслі страты. Аднак падатковая запазычанасць стала непад'ёмным цяжарам не толькі для ўладальнікаў гэтага бізнесу - у сферы адпачынку і забаў страты панеслі ад 20 да 36% кампаній.

Банкруцтвы

Яшчэ абмяркоўваючы сітуацыю ўлетку, міністэрства фінансаў адстойвала пазіцыю немэтазгоднасці далейшых паслабленняў. Колькасць банкруцтваў, па прагнозах урада, павялічыцца нязначна, пры гэтым збанкрутуюць тыя кампаніі, якія яшчэ да каранакрызісу былі нежыццяздольныя.

Міністэрства баялася, што далейшая дапамога створыць няроўныя правілы гульні: добра працуючыя і без падтрымкі кампаніі павінны канкурыраваць з кампаніямі, якія працуюць горш, але атрымліваюць падтрымку.

Прапановы ад арганізацый прадпрымальнікаў

«Каранавірусныя» даўгі наваліліся на прадпрымальнікаў у няўдалы час, калі хуткі рост заробку і выдаткаў на энерганосьбіты і так ледзь дазваляе трымацца на плаву. Акрамя таго, малым кампаніям давядзецца плаціць больш падатку на прыбытак, і паслабленняў ад урада можа апынуцца недастаткова.

На думку прадпрымальнікаў, ва ўмовах, калі рахункі за электраэнергію ў чатыры (а ў некаторых выпадках - і ў адзінаццаць) разы вышэй, чым раней, было б карысна, калі б урад прадаставіў ільготныя крэдыты для забеспячэння ўстойлівасці бізнесу. Наколькі гэта рэальна? Пра гэта мы зможам даведацца ў бліжэйшы час.