З верасня Нідэрландскія чыгункі (NS) скарачаюць колькасць цягнікоў. Прычына - недахоп персаналу. Графік руху цягнікоў на 2023 год апублікуюць у снежні, але жыхарам Нідэрландаў трэба рыхтавацца да таго, што адменяць каля 10% цягнікоў.
NS заяўляе, што жадае дапамагчы пасажырам, але не можа забяспечыць перавозкі. Колькасць міжгародніх цягнікоў будзе скарочана да 4-х замест 6-ці, якія курсуюць зараз. Вячэрні расклад будзе пачынацца а 20:00 замест 22:00. Вячэрнія цягнікі і спрынтэры будуць хадзіць раз на паўгадзіны (замест 15 хвілін зараз).
Дырэкцыя NS заяўляе, што графік руху цягнікоў складаецца з разлікам на павелічэнне пасажырапатоку. У цяперашні час у NS адбываецца забастоўка, звязаная з патрабаваннем павялічыць заробкі персаналу.