Падаткаплацельшчыкі не могуць разабрацца з выдаткамі на ахову здароўя

Каля 28 працэнтаў падатковых дэкларацый, у якія ўнесены расходы на ахову здароўя, запоўнены з памылкамі. Гэта датычыцца сумы ў памеры 346 мільёнаў еўра (39% ад заяўленых расходаў на ахову здароўя). Справаздачу з такімі лічбамі і паказчыкамі прадставіла парламенту міністр доўгатэрміновага догляду і спорту Коні Хелдэр (Minister voor Langdurige Zorg en Sport Conny Helder).

Падатковы вылік і дапамога на ахову здароўя

Галандцы з нізкім даходам маюць права пры пэўных умовах атрымаць ільготы, звязаныя з расходамі на ахову здароўя:

• aftrek zorgkosten - падатковы вылік выдаткаў на ахову здароўя;
• tegemoetkoming specifieke zorgkosten (TSZ) - дапамога на медыцынскія выдаткі.

Падаткаплацельшчыкі могуць адняць у падаходным падатку пэўныя выдаткі на ахову здароўя ў абмежаваных межах. Напрыклад, гэта датычыцца расходаў на лекі і іншыя дапаможныя сродкі медыцынскага прызначэння. Пры гэтым нават пасля прымянення выліку часам людзі з нізкім даходам могуць атрымаць яшчэ і права на дапамогу. Калі падаткаплацельшчык, запаўняючы падатковую дэкларацыю, указаў выдаткі на ахову здароўя і адпавядае ўмовам для атрымання дапамогі, то падатковыя органы налічваюць яе аўтаматычна.

Занадта складаная схема

Прадстаўнікі падатковай службы згаджаюцца з тым, што схема пакрыцця выдаткаў на ахову здароўя мае вельмі складаную структуру. У падаткаплацельшчыкаў узнікаюць няяснасці па многіх артыкулах затрат, у выніку чаго яны дапускаюць памылкі. Аўтары справаздачы для ўрада непакояцца, наколькі здзяйсняльная і дастасавальная гэтая схема ў тым выглядзе, у якім яна цяпер.

Падатковыя органы правяраюць толькі частку дэкларацый

На гэты момант падатковая служба не можа правяраць усе дэкларацыі. Дэкларацыі для праверкі выбіраюцца падатковымі органамі шляхам прымянення пэўных крытэрыяў. Немагчыма апрацаваць усе дэкларацыі, якія могуць змяшчаць падатковыя рызыкі.

Карэктнасць ужывання схемы TSZ таксама пад пытаннем

Па дадзеных падатковых органаў, памылкі могуць узнікаць у дадзеным выпадку не столькі па віне падаткаплацельшчыкаў, колькі па тэхнічных прычынах. Больш за тое, канкрэтызацыі патрабуюць самі правілы разліку.

Аўтары справаздачы для ўрада рэкамендуюць больш дакладна сфармуляваць мэту прымянення схемы, а таксама ўсталяваць, у якой ступені ўрад гатовы кампенсаваць медыцынскія выдаткі мэтавай групы. Апроч гэтага, удасканаленні патрабуюць таксама муніцыпальныя схемы пакрыцця выдаткаў на ахову здароўя. Неабходна забяспечыць, каб падаткаплацельшчыкі разумелі асаблівасці прымянення такіх схем - тады верагоднасць памылак у падатковых дэкларацыях скароціцца. Міністр доўгатэрміновага догляду і спорту Коні Хелдэр і міністр фінансаў Зігрыд Кааг (Sigrid Kaag) паабяцалі пракаментаваць справаздачу пазней.