28 красавіка.2022 года амерыканскі Кангрэс большасцю галасоў прыняў «Закон аб ленд-лізе ў абарону дэмакратыі ва Украіне ад 2022 года» № 3522. Сенат Злучаных Штатаў ухваліў гэты дакумент яшчэ 6 красавіка.
Цяпер прэзідэнт ЗША можа арганізоўваць пастаўкі Украіне і краінам Усходняй Еўропы ўзбраенняў і іншых неабходных тавараў без працяглых бюракратычных затрымак. Гэтыя пастаўкі вызвалены ад абмежаванняў, устаноўленых Законам аб замежнай дапамозе і Законам аб кантролі за экспартам зброі. Пастаўкі будуць праводзіцца без папярэдняй аплаты. Прэзідэнт ЗША павінен у тэрмін не больш за 60 дзён устанавіць паскораную працэдуру дастаўкі ўзбраенняў і іншага абсталявання ва Украіну. Прэзідэнт можа перадаць паўнамоцтвы, звязаныя з ленд-лізам, чыноўніку, прызначанаму ім па ўзгадненні з Сенатам.
Гэта другі закон аб ленд-лізе ў гісторыі ЗША. Першы быў прыняты ў час Другой сусветнай вайны і ў значнай меры забяспечыў перамогу саюзнікаў над нацысцкай Германіяй.
