Расія спыніла пастаўкі газу ў Польшчу і Балгарыю

Раніцай 27 красавіка 2022 года былі спынены пастаўкі расійскага трубаправоднага газу ў Польшчу і Балгарыю. Фармальна прычынай спынення паставак газу з'яўляецца спрэчка па аплаце сыравіны. У сувязі з вайной ва Ўкраіне Расея склала спіс недружалюбных краін, якія аказваюць дапамогу ўкраінскаму народу. У гэты спіс, у прыватнасці, увайшлі практычна ўсе краіны Еўрапейскага Звяза, у тым ліку і Нідэрланды. Ад «недружалюбных» краін Расея запатрабавала рабіць аплату газу ў рублях. Краіны ЕС адмовіліся выконваць гэты ультыматум.

Усе заключаныя кантракты на пастаўкі газу ў ЕС усталёўваюць у якасці сродку аплаты даляр ЗША ці еўра. Аднабаковае змяненне ўмоў кантракта з боку Расіі з'яўляецца неправамерным, аб чым і было паведамлена Расіі. Аднак палітыка выкарыстання энергетычных паставак у ЕС у якасці зброі супраць дэмакратычных дзяржаў была працягнута. Прыкрываючы злачынныя дзеянні дэмагогіяй аб эканамічнай спрэчцы, Расія перакрыла газ Балгарыі і Польшчы.

Варта сказаць, што чарговая спроба шантажу не прынясе карысці расейцам, а толькі пагоршыць іх імідж надзейнага пастаўшчыка. Польскія газасховішчы запоўнены на 73 працэнты, ёсць газаправоды, якія даюць магчымасць атрымліваць газ з іншых краін ЕС, і тэрмінал па прыёме звадкаванага газу. Польшча даўно паведаміла аб нежаданні працягваць з "Газпромам" кантракт, тэрмін дзеяння якога заканчваецца сёлета. Урад Балгарыі таксама паведаміў, што спажыўцы газу ў краіне не пацерпяць.